- प्रा. कमलप्रकाश मल्ल
थौकन्हय् पोष्ट मोर्डनिज्म, पोष्ट स्ट्रक्चरलिज्म धकाः विभिनन किसिमयागु मुभमेन्ट ट्रेण्डत वइच्वंगु दु । थ्व ट्रेण्ड झीगु नेपालभाषा साहित्यय् नं दुहाँवःगु दु । नेपालभाषाया लेखकपिं नेपालभाषाया कविपिं खास यानाः एकदम सजग व सचेत खनेदु । जिं गनतक खना नेपालभाषय् थ्व उपमहाद्वीपय् वःगु साहित्यिक वाद, ट्रेण्ड, प्रकृतिं अक्षुण्ण मखु उकिं प्रभावित जूगु दु । झी पूर्णबहादुर वैद्यजुया कविता ब्वन धाःसा स्पष्ट जुइ, झीगु कविता नं वास्तवय् थ्व उपमहाद्वीपया छुं हे भाषागु कविता स्वया म्हो मजू । अथे हे धैथें धूस्वांया उपन्यास ब्वना दिसँ, खास याना न्हूगु पिहाँ वःगु 'निभाः' उपन्यास । थ्व उपन्यास तसकं उत्कृष्ट जू । अथे हे झीगु ऐतिहासिक नाटक, सुदर्शन भन्ते व स्व. हेमलाल जोशीजुया नाटक, जिं स्वयेबले उगु ज्वःगु नाटक नेपाली नं मदुथें च्वं । नेपाली भाषाय् यक्व लेखक दु, खः । सलंसः पत्रपत्रिका दु, उकिं यक्व गतिविधि जुयाच्वंथें च्वनिगु । झीगु भाषाय् पत्रिका नं म्हो, लेखक व पाठक नं म्हो उकिं झीगु भाषाय् छुं गतिविधि मजूथें च्वनीगु । तर वास्तवय् मखु । झीगु भाषाय् नं तसकं च्वन्ह्याःगु कविता च्वइच्वंगु दु । च्वन्ह्याःगु बाखं च्वइच्वंगु दु । तर लेखकपिं तसकं म्हो, पाठकपिं नं म्हो पत्रिका नं म्हो अथे जूगुलिं झीगु भाषाया स्तर तसकं क्वय् लाः धकाः झीत महसूस जुइगु स्वाभाविक खः ।
(पलिस्था, दँ ४, ल्या: ४, नेसं १११६)